政情：肥胡內蒙遊 飲酒爆笑料
醫管局主席胡定旭最近暴肥又暴瘦，惹起外界揣測，原來佢早前去咗一趟內蒙古訪問，日日大啖羊肉、豪飲白酒，結果體重由一百八十五磅勁增十四磅，達至一百九十九磅嘅爆燈邊緣。肥胡返港後進行地獄式減肥，先至令體重返到原點。佢呢趟內蒙古之行，仲爆出一段笑料。
蒙古族人豪情好客，肥胡一到埗就有個好特別嘅歡迎儀式，一眾着住民族服飾嘅俊男美女跳舞迎賓，然後眾人以細酒杯對飲乾杯，期間又用白酒向上向下酹酒，寓意「感謝天、感謝地」，飲完之後，嘉賓會被戴上一條絲質頸巾，儀式既傳統又有大草原牧民嘅民族風情。
最搞笑係有次飲宴，當地官員以頂級白酒「河套王」招呼肥胡一行人，主人家攞出珍藏嘅「雍正三號」巨型古碗，斟滿白酒請肥胡一次過乾晒佢。見到面盆咁大碗酒，嚇到肥胡呆咗，心諗一次過飲晒肯定醉到不省人事，於是人急智生翻做到埗時見識嘅酹酒禮數，將白酒潑到成身、成地都係，兼且將碗酒分開成個鐘嚟飲，搞到主人家都覺得奇怪。其後主人家一見肥胡飲完，即時將古碗收回，可能驚打爛啩！