中環出更：中大60周年宴 會展變校園
中大崇基學院尋日喺灣仔會展舉行六十周年校慶晚宴，筵開一百三十圍，一千六百個崇基校友齊齊到賀，嚟個崇基一家親。大會別出心裁布置會場，將崇基嘅一草一木搬晒過去，讓大家重拾當年大學回憶。尋晚一班籌委會成員清一色打暗紅色呔，崇基院長梁元生話，每個學院都有自己嘅顏色，佢哋呢隻色叫做「崇基紅」。
陳德霖迎新營談時事
晚宴籌委會主席、金融管理局總裁陳德霖相當高興，佢話自己七六年喺社會系畢業，副修經濟。當年佢家住北角，由於交通冇咁發達，火車一個鐘頭只得一班，返中大要花兩個鐘頭，所以與同學夾份喺大埔租屋住。佢話最難忘係迎新營嘅時候，同師兄師姐一齊就社會問題促膝夜談，至今仍歷歷在目。
撐中大嘅仲有消費者委員會總幹事劉燕卿（Connie），佢同老公梁先生拍住拖到場。Connie憶述，當年最難忘係做「人肉運輸帶」，幫學院嘅圖書館搬竇，百幾個同學仔，一個傳一個咁，足足搬咗幾日。不過，佢一啲都唔覺得辛苦，仲好興奮添，因為搬書代表崇基精神薪火相傳喎。
存款保障委員會主席陳黃穗當年喺社工系畢業，佢話當年社工系都幾難考入，但佢成績唔錯，仲攞到獎學金添。佢話當年嘅火車好有特色，車上面有沙田柚、鳳爪同墨魚賣，成間酒樓咁。當年火車仲係用緊柴油，會噴黑煙嗰隻，每次由火炭入大學站捐山窿，佢哋都要即刻閂晒啲窗，如果唔係就會變花面貓。嶺大校長陳玉樹就曾經有咁樣嘅經歷，佢話如果遲到仲慘，要「掹車邊」企喺火車樓梯旁，焗住食塵喎。佢哋嘅大學點滴，相當有趣。
卓妮