有「小強」之稱嘅曱甴，生命力頑強係人都知，但頑強到周圍都有，食火鍋又見，食米粉又有，食早餐又出現，飲木瓜湯又蒲頭，咁就真係夠晒誇張兼恐怖咯！
唔係嚇你㗎，你睇吓連鎖快餐店大家樂嘅「加料」事件簿，就知道以上所講全部係事實，珍珠都冇咁真。呢，繼日前有市民投訴喺大家樂屯門蝴蝶廣場分店食火鍋送生猛曱甴後，同區屯門市廣場分店亦被食客投訴，話進食半碗米粉後先至發現有隻曱甴屍體浮上湯面，當堂反晒胃，幾乎連隔夜飯都嘔埋出嚟。
正所謂，一件污，兩件穢，大家樂食物加送「小強」嘅個案又點止咁多吖。舊年有市民喺奧海城一期分店外賣炒滑蛋雞扒早餐，進食時發現內有曱甴；今年初有對父女喺鴨脷洲利東邨商場分店食午餐，亦駭見木瓜排骨花生湯入面有曱甴……咳，唔怪得有人將大家樂嘅宣傳口號改為「大渣落，令你嘔足一百分」！
其實，呢啲都係冰山一角咋，大渣落令你嘔足一百分，簡直五花八門，無奇不有。譬如話，食火鍋送菜蟲、食四寶河送煙蒂、食免治牛肉飯送金屬條、食早餐送透明膠紙等等，問你怕未。而最誇張嘅係，有食客喺大家樂用膳期間，居然有隻老鼠從天而降，仲碰到食客手腕添。人鬼情未了就見過啫，人鼠同枱食飯，你又見過未吖！
咁都未算，網上流傳一段名為「天水圍一家狗男女」短片，證實大家樂唔只衞生條件惡劣，而且漠視法紀添。有食客投訴喺天水圍頌富商場大家樂分店食下午茶餐時，隔鄰枱一對男女帶同狗隻進食，呢位食客不滿狗毛亂飛污染食物，向該店副經理投訴，點知副經理居然掉番轉頭要求投訴人更換座位，簡直九唔搭八。嗱，《食物業規例》白紙黑字寫明，任何人不得將狗隻帶入食肆，經營者明知而容許狗隻留喺食肆即屬違法，大家樂究竟係唔識法例，定係懶理法例呢？
講起大家樂，唔能夠唔提刻薄嗰一筆。實施最低工資前，年年賺大錢嘅大家樂居然扣除員工飯鐘錢，搞到滿城風雨，「做足一百分」當堂變成「刻薄一百分」，無良僱主之名遠近馳名，影衰成個商界。
話時話，大家樂衞生惡劣，污糟邋遢，投訴幾乎厚過電話簿，唔通無王管嘅咩？其實唔係無王管，而係負責監管嘅食環署敷衍了事，得過且過，有王管等於無王管。嗱，咪話功夫茶唔提醒吖，如果食衞局局長周一嶽仲唔做好自己份工，繼續放任食肆製造不潔食物，萬一搞到有人禍從口入咯喎，你都走唔甩嘅咋！