我哋早兩日寫過，籌備中嘅工黨原定派出職工盟李卓人，角逐明年立法會嘅超級區議會議席，但點知最後喺區議會選舉輸咗畀工聯會小花劉桂容，之後佢哋想翻兜街工梁耀忠入黨選超級區會，又畀阿忠請食檸檬。工黨核心成員何秀蘭（阿Cyd）尋日承認佢哋依家冇人冇物（資源），唔會再諗參選超級區會，但係亦無阻佢哋創黨，將於下個月十八日正式成立。
阿Cyd拒絕透露佢哋有幾多同有乜知名黨員，淨係講工黨嘅重點將會放喺保育同保育城規等環保議題，又語重心長咁話民主派咁多位大哥大姊唔一定次次都要做主角，明年選立法會可以幫吓班年輕黨員抬轎，等佢哋有得上位喎。
至於個黨章，佢話亦已經完成得七七八八，依家淨係要再執番啲字眼。
阿Cyd又講笑咁話，由於工黨喺十二月十八日成立，可以考慮用柴可夫斯基嗰首《1812序曲》做黨歌，貪佢夠晒氣勢，呢個gag真係爛到爆！