政情：陳振彬泰製衣廠堪憂
曠日持久嘅泰國水災，唔單止令港人少咗個度假勝地，仲連帶好多工廠都要減產甚至停工。喺泰國有投資設廠嘅觀塘區議會主席陳振彬（Bunny）亦唔例外，其製衣廠位於曼谷西部，本來唔受水災影響，但近日泰國政府為咗紓緩汛情，決定將洪水分兩路引向曼谷嘅東部同西部，並引向大海，令佢嘅製衣廠隨時會受到洪水的威脅。
不過，Bunny並無趕去泰國廠房做「防洪總指揮」，反而好淡定留喺香港。佢話防洪嘅工作交由當地嘅廠長處理，廠房四周已經用沙包築起一道一點五米高嘅堤圍，所有生產物資亦搬上較高樓層。
雖然廠房硬件可以保周全，但係佢仍擔心廠房工人因水災而疏散，必然會返回家鄉，日後廠方要召回工人將會大費周章。
Bunny認為，如果泰國注重基建嘅話，今次水災未必會咁嚴重喎，事關十幾年前佢去泰國投資設廠至今，當地道路狀況並無大改變，與中國一日千里嘅發展真係不可同日而語。