政情：飲食界選委好戲連場
香港餐飲聯業協會會長黃家和（Simon）一直關注飲食業界權益，並密謀強勢挑戰盤據立法會飲食界議席十多年嘅自由黨張宇人（Tommy）。據聞兩人將首度喺選委會交手，因為Simon正醞釀支持友好名單參選選委，同Tommy支持嘅飲食界十七人名單拗手瓜，間接測試吓自己喺業界嘅人氣同埋支持度，張黃之爭可謂一觸即發。
有飲食界消息指，Tommy疑似打破多年嘅慣例，失驚無神推出飲食界十七人名單，而名單內多數都係大企業嘅代表，令到業界嘅中小企有所怨言，所以唔少業界中人都蠢蠢欲動想一試身手。據聞Simon對此亦樂觀其成，只要友好名單準備就緒就會表態支持，甚至居中協調喎。
雖然Simon以強勁挑戰者嘅姿態出現，但Tommy接受我哋嘅查詢時明顯未驚過，仲語帶譏諷話如果有人要試水溫，都要個個人願意跳落水，否則都唔知啲水得唔得喎，擺明暗寸Simon唔敢落水。
話時話，張黃二人今次首度短兵相接已經充斥住火藥味，相信飲食界一定會好戲連場。