政情：李慧玲前夫再婚訴心聲
尋日係「六條一」特別日子，香港有過千對新人拉埋天窗，芸芸新人之中，包括再婚嘅香港賽馬會公共事務經理何永康，佢係電台節目主持人李慧玲嘅前夫。據聞何永康尋日擺酒期間，唔知係咪飲得興起，忽然盡訴心中情，坦言自己之所以能夠放下重重心債，再度抱得美人歸，有賴佢嘅新老婆、湖北姑娘紅姐。
何永康尋晚喺紅磡黃埔新天地巧饍坊筵開四席，請嚟圈中好友電台節目主持人楊振耀、前電視新聞主播張宏艷等，分享抱得美人歸嘅喜悅。唔少人都知道，何永康同李慧玲結過婚，可惜最後離婚收場。據聞新郎哥尋晚飲大兩杯講番啲陳年往事，形容自己在人生失意之時，紅姐雪中送炭，對佢不離不棄，仲以電話隔空安慰，鼓勵佢重新振作，甚至豪言：「無飯開就嚟深圳搵我」，終於重燃佢對人生嘅希望，於是就打動咗佢。
一對新人唔只喺香港擺酒，據聞今日會起程遠赴湖北武漢再擺酒，延續新婚喜悅，聽聞部分尋日有份去飲嘅賓客都會跟埋去，認真高興。