中環出更：大忙人純官快閃巡舖
新世界集團嘅業務遍布各行各業，相信新世界發展董事總經理及新創建主席鄭家純都好忙吓，點解？卓妮日前下晝經過中環皇后大道中嘅時候，就見到純官同一個助手啱啱由新世界大廈行出嚟，匆匆走入附近嘅周大福珠寶店，但好快就行番出嚟，可以稱得上係極速突擊巡視業務。
職員急忙收起輕鬆
當日卓妮見純官邊行邊講電話，機不離手，真係大忙人。佢傾完電話後，就不動聲色行入周大福，店內職員睇嚟唔知道老闆突擊巡舖，神色由輕鬆剎那間轉為凝重，個個立即企起身，肅然起敬。由於時間關係，純官只係逗留咗短短幾分鐘時間，係咁意望吓啲飾櫃，兜咗個圈後，再同員工傾咗幾句就離開。
卓妮上前同純官打招呼，問佢周大福係咪推出新鑽飾設計，佢就話暫時都未有住，遲啲有就會同大家講喎。
分秒必爭嘅佢，又係一邊講電話，一邊匆匆往置地廣場方向行去，最後登上私家車離開。