中環出更：胡太：男人風流唔下流
中文大學首個小規模書院「晨興書院」尋日開幕，除咗一班校董撐場外，合和實業主席胡應湘（哥頓）太太胡郭秀萍都有去湊熱鬧。胡太回應老公早前講過嘅「人不風流枉少年」嘅言論時話，風流都唔緊要，唔好下流就得喇。佢仲話，老公同佢結婚之前係點就唔知，但咗結婚之後對佢一心一意就已經夠喇！
問到哥頓年輕時係咪好風流、身邊係咪有好多女朋友？胡太話，老公三十幾歲先至成家立室，都算係遲婚，如果話畀人聽佢結婚之前冇拍過拖，大家信唔信吖？過去發生咗嘅事，過咗去咪算囉，認真大方。胡太仲好幽默咁話，風流都未必係壞事，風流倜儻都得嘅啫，可以係褒義嚟o架。
咁唔知胡太又怕唔怕囝囝胡文新風流呢？佢話後生仔嘅感情事冇得干涉，盡番做父母嘅責任就夠喇，其他嘢由得囝囝自己決定啦。至於有冇催婚，胡太就話依家社會普遍都遲婚，唔會心急喎。
鄭海泉退咗休仲忙
卓妮同場又見到中大校董會主席、前滙控大班鄭海泉，望落佢精神唔錯，不過比之前瘦咗，佢話自己身體幾好，退咗休之後留喺香港，同老友敍舊外，又要處理中大校務同其他公職，睇嚟仲忙過未退休喎。
卓妮