政情：阿人投年宵檔遇阻力
區議會選戰塵埃落定，職工盟立法會議員李卓人（阿人）喺天水圍輸咗畀工聯會小花劉桂容。尋日佢以支聯會主席身份，代表該會競投一年一度嘅維園年宵攤位，又不斷有人競價，最後成交價比起舊年高出接近一成，要用四萬五千幾蚊先投到支聯會每年都投開嘅一、二號攤位，真係福無重至，禍不單行！
阿人就話，今年叫咗十幾口價先投到該兩個攤位，的確比舊年貴咗，但佢話香港係商業社會，年年競投都有人同佢哋爭，唔覺得同政治有關。佢又話雖然原支聯會主席司徒華已經唔喺度，但支聯會今年個攤位會照舊翻印華叔生前寫落嘅揮春賣，即使租金成本貴咗，但有信心籌到錢。
阿人就捱貴租，但同樣喺區會落選嘅阿牛曾建成，代表社民連競投嘅維園年宵攤位就反而平咗成萬蚊，只須約三萬零蚊就投到六號攤位，今年會照舊賣社民連T恤籌款。
另一喺區選慘敗嘅政團人民力量，就夾埋用咗近九萬銀投咗三個相連單位，但未知係貴咗定平咗。