政情：工聯大平賣否認謝票
工聯會喺今屆區議會選舉贏到開巷，最矚目係該會副會長陳婉嫻喺黃大仙龍上選區壓倒性勝利，嫻姐呢幾日四出謝票之餘，原來工聯會會喺明日到月底分別喺屯門仁愛廣場同黃大仙龍騰墟舊址搞個特惠購物周，糧油雜貨等以低至六折出售，惹來益街坊謝票疑雲。工聯會理事長吳秋北（吳揪得）就話，特惠購物周一向有搞開，絕對唔係謝票喎。
吳揪得話，工聯會一直都熱心同市民一齊抗通脹，好似到各區街市格價，等市民知道邊度有平嘢執。不過，最近有傳聞話超市指使供應商控制零售商標價，問吳揪得擔唔擔心工聯會攞唔到平貨，佢就希望超市體諒該會只係想方便市民抗通脹，可以高抬貴手，唔好咁霸道難為活動嘅供應商，等該會可以繼續賣平嘢益街坊喎。
其實幾年前喺黃大仙舉辦特賣會期間，已有商戶投訴被搶客，今次工聯喺同一地方再搞大平賣，唔知有冇人投訴呢？