政情：肥平四圍搵位爭選委
特首選舉委員會提名期開始咗幾日，陸續有人報名參選，雖然呢啲小圈子選舉無乜代表性，但都算係政治油水位，所以好多人恨做，但選委得一千二百個，好多人爭崩頭都搵唔到位出選。前民政事務局局長何志平（肥平）除咗上屆做官無得做選委外，九六年同○○年都循文化界別做選委，今屆都有意一戰，但據聞文化小組今屆早已組成十五人名單，等於將肥平拒於門外，搞到佢要轉戰其他界別。
肥平本身係全國政協委員，本來可以喺政協界別出選，可惜政協選委只得五十五個，而且有百幾人爭奪，據講肥平逼都逼唔入，惟有焗住返去老本行循文化小組出戰。不過，肥平離開文化小組界別多年，唔係期望小組留番個位畀你下話？所以肥平未諗掂係咪參選，代表該界別嘅立法會議員霍震霆（Tim霍）已一馬當先拉大隊報名，仲啱啱好湊成十五人名單，如果無人競爭，即可以自動當選。
換言之，即係文化界人士本身已協商好，無諗過受肥平玩，如果肥平硬要落場選舉，睇怕贏面未必太高，到頭來更傷和氣。不過，肥平仲有一線機會，因為文化界別十五人名單中，仲有兩個人未報名，如果肥平能夠說服Tim霍收留佢，咁就可以玩喇。但知情人士話，一班文化界人士未必贊成，因為覺得肥平做局長時都無乜大力推廣文化政策，認為佢未有能力代表文化小組喎。
醫學界機會仲高？
聽聞選委會仲有個不成文嘅規矩，就係喺同一界別，唔可以做多過兩屆，以免有人賴死唔走。所以有人已經勸肥平一係唔好選，一係轉戰其他界別，例如醫學界等，話晒佢都係眼科大國手，喺醫學界出戰，分分鐘機會仲高啦。其實肥平九六年開始做選委，只係上屆因為做官而無得參選，以佢嘅江湖地位，今屆唔選其實無乜大不了，但如果夾硬參選又畀人大比數擊敗，喺政界嘅聲望就真係多年道行一朝喪喇。