中環出更：恒指跌千點四叔話後市「唔識睇」
受歐債危機影響，尋日港股急瀉千點。恒基地產主席「四叔」李兆基同長實執行董事「趙樓神」趙國雄尋晚出席福布斯（Forbes）頒獎禮晚宴時，被問到點睇後市，四叔就話「唔識睇」，對本地樓市亦只係話「一般咁啦」；而趙樓神就話歐債唔會波及本港樓市，因為大家仲有工開喎。
趙樓神尋晚以得獎人身份出席頒獎禮，對於港股大跌，佢話毫無疑問係受到歐債危機所累，但佢話希臘只佔歐洲經濟百分之二，已經好麻煩，而意大利則佔歐洲經濟百分之八，一旦出事後果可想而知。不過，趙樓神相信今次經濟危機一定會雨過天青，但就要付出相當嘅代價，過程都可謂相當痛苦。
趙國雄指影響樓市微
趙樓神認為，未來兩個月歐債問題仍然困擾股票市場，但對本港樓市就影響唔大，因為歐洲同香港嘅經濟並唔係太密切，況且息率長期低企。不過，佢話最重要嘅係人人有工開，咁至係穩定嘅關鍵。