中環出更：陳智思競投「鑽的」食白果
社會創投慈善基金會轄下嘅社會企業「鑽的」，尋日推出咗一比四十三嘅的士模型，基金會顧問委員會主席夏佳理（Ron）、基金顧問陳智思（Bernard）、「鑽的」榮譽顧問梁智鴻（金刀梁）及皇冠汽車執董李世賢（Patrick）一齊幫首批模型嘅出世紙簽名留念，佢哋都對呢批模型愛不釋手，仲一齊競投心頭好添。
金刀梁買「易發」的士模型
「鑽的」今次拍賣五部模型為社企籌款，每部底價五百四十蚊，規則話就話每次叫價廿蚊，但嘉賓們出手一啲都唔手軟，叫價以千元遞增，金刀梁更以五千蚊投得編號「028」嘅模型，取其諧音「易發」。佢咁捨得，係因為同佢座駕車牌號碼2888襯晒，而且做善事，幾貴都抵啦。Patrick仲搞鬼，自己主持拍賣，竟然叫價後即扑錘，真係服咗佢。
至於Bernard，本來好鍾意部的士模型，大讚手工精美，並踴躍競投首部編號「001」嘅模型，叫到三千蚊嘅時候諗住先拔頭籌，點知畀台下嘉賓搶灘，叫價五千蚊成交。之後Bernard再接再厲，可惜又係畀其他嘉賓截胡，最後一部都投唔到，唔通連做善事都冇人讓路畀佢？不過，本月底仲有八百部的士模型喺灣仔會展嘅「社會企聯展」公開發售，到時Bernard大可以再買過。
