政情：阿忠再質工黨食檸檬
泛民主派喺今屆區議會選舉大敗後，各黨派都要重新調整方向，繼續上路。除咗輸到趴街嘅公民黨、社民連同人民力量之外，醞釀喺區選後正式成立嘅工黨亦好頭痕，原本諗住職工盟立法會議員李卓人贏咗區選後，可以代表工黨出戰明年立法會超級區議會議席，點知阿人最後輸咗，如意算盤打唔響。據聞區選過後，阿人同社福界立會議員張國柱兩大工黨支柱，曾經再搵攞到超級區會入場券嘅街工梁耀忠過檔，可惜阿忠第二次畀大檸檬工黨食，講到明叫佢哋唔使諗。
阿人區選倒灶失預算
從政近廿年都從未選過區議會嘅阿人，今屆突然空降天水圍參選，盲嘅都睇到佢真正目標係超級區會，幫即將成立嘅工黨打響頭炮，提高知名度，再帶動喺其他地區直選嘅黨友造勢谷票。不過，阿人最後大熱倒灶，畀工聯會小花劉桂容擊敗，「氹仔浸死蛟龍」，惟有硬着頭皮尋覓其他人選。
其實早喺區選前，工黨已游說街工同佢哋嘅靈魂人物阿忠加盟，不過對方覺得街工同工黨好難分清楚角色，到底係邊個話事，一直傾唔掂數，所以街工早前已正式投票通過唔會加入工黨，連阿忠以個人名義加入都唔得。但由於泛民勞工界今屆唯一贏到區會議席，而又具全港知名度嘅，就只係剩番阿忠一個，阿人同阿柱惟有冒住再次食檸檬嘅風險，再同阿忠講入工黨嘅問題。
從今屆區選結果可以睇到，街工喺新界西、尤其係葵青區有雄厚地區實力，選區議會絕對冇問題，但有能力同知名度選立法會嘅，多年來都只得阿忠一個，所以阿忠如果捱義氣幫工黨走去選超級區會，係就係有可能選到，但佢喺新西嘅議席空缺，就好難有人替代，對自己同街工都冇乜着數，一個唔好彩輸咗就仲大鑊，不如留番喺新界做「山寨王」好過。所以阿忠好坦白咁同兩位講，點都唔會入工黨，最多會以個人身份支持工黨嘅活動，但點都唔會離棄街工呢個「親生仔」。
工黨之前講到好聲勢浩大，諗住阿人出戰超級區會，再將阿人喺新西個位讓畀前公民黨成員張超雄，再加上港島區嘅何秀蘭同社福界嘅阿柱，希望最少取得四席。但如今不但冇人出選超級區會，張超雄亦都冇位落腳，唯一可以諗嘅係阿人空降到其他區參選。但經過今屆區選之後，相信阿人已經畀「空降」呢兩個字嚇怕！