秋風起，膏蟹肥，大閘蟹又當造，老饕又有口福喇。不過，有口福還有口福，今年食蟹千祈要打醒十二分精神，否則，一個唔覺意，蟹粉小籠包隨時會變「奪命小籠包」㗎。
江蘇無錫近日爆出驚天醜聞，有不法商人大量收集垂死，甚至已經死咗嘅大閘蟹，攞嚟「拆蟹粉」，然後瞞天過海，將死蟹粉當新鮮貨出售。最令人作嘔嘅係，加工場內衞生環境惡劣，工人連手套、口罩呢啲基本裝備都冇，咁嘅蟹粉，食你唔死算你命大！
專家話，死蟹會孳生大量細菌，擺得愈耐愈牙煙，加工同運輸處理不當，會出現大腸桿菌或金黃葡萄球菌，如果死之前被灑過藥，更可能含致癌物質添。話時話，今時今日內地同香港交流頻繁，幾乎冇分界，內地有死蟹粉，香港亦隨時中招嘅咋，如果監管部門仲好似以前咁拾吓拾吓，甩甩漏漏，咁就大件事嘞。
唔係靠嚇㗎，前排食安中心抽驗咗百幾個大閘蟹樣本，其中一個竟然含獸藥，雖然當局聲稱含量較低未必影響健康啫，但大吉利是講句，如果含量高啲，可能已經搞出人命，呢隻鑊邊個孭先？
其實點止大閘蟹有問題吖，內地黑心食品氾濫成災，簡直令人防不勝防。呢，早排有市民喺元朗買咗一箱新會柑曬果皮，點知曬乾之後柑皮竟然甩色，懷疑有人出蠱惑落咗染料。大家都知，工業染料可以致癌，港人喜歡煲靚湯，果皮幾乎係必備之選，你話奸商係咪靠害吖。
講開問題食品，近排就有好幾單。湖南長沙日前破獲一個跨省製造銷售網絡，無良商人竟然用工業漂白劑、皮膚病藥及硼砂等，加工製造毒腐竹、毒粉絲。
仲有吖，浙江、福建、山東等省市警方啱啱查獲咗近一萬五千瓶冒充「茅台」、「五糧液」等品牌嘅假酒，市值超過三十億元。有啲 「茅台」包裝仲印有「國務院機關事務管理局、機關服務局專用酒」字樣，連「國務院」都做埋無良奸商嘅護身符。
而最令人嘆為觀止嘅係，有人用塑膠製造假豬耳，問你服未！唔怪得有人話，黑心食品氾濫，中華民族正面臨種族滅絕嘅「最危險時候」。
有樣嘢功夫茶諗極都唔明，中國科技發展進步神速，連神舟八號同天宮一號太空對接咁高精尖嘅技術都搞得掂，但居然搞唔掂問題食品，冇辦法令人民食得放心，你話係咪好荒謬吖。中國政府傾盡全力圓「太空之吻」美夢，卻懶理黑心食品嘅「死亡之吻」，簡直係諷刺之極。唉，大國崛起喎，發夢都冇咁早喇！