政情：林D9似局長多過司長
今屆區議會選舉氣氛冷淡，究竟係咪政府宣傳不足呢？呢個問題本應係政制及內地事務局局長嘅工作範疇，但已升為政務司司長嘅林瑞麟，尋日竟然對呢個問題侃侃而談，完全遺忘咗自己係政府第二號人物，同佢當年由新聞統籌專員轉做局長一樣，一時間搣唔甩以前個舊角色。
林D9尋日出席義務工作發展局活動後，自動波同傳媒講，今日嘅區選非常關鍵，因為影響出年立法會選舉嘅超級區議會議席，所以選民要積極投票。佢全程唔使睇稿，表現相當專業，同佢做政制及內地事務局局長嘅時候無分別。
之後有記者問林D9，政府喺今次區選係咪宣傳不足？林D9立即撻着人肉錄音機功能，播帶話呢次當局投放喺宣傳嘅資源比以往多，而候選人喺地區建立多年嘅網絡，先至係參選嘅成功基礎，相信市民自有判斷喎，好似兼任政制及內地事務局局長咁，睇怕新任局長譚志源可以提早收工。