政情：候選人吹雞逼爆黃埔
各區區議會候選人尋日把握最後機會拉票，其中一個戰況較激烈嘅九龍城黃埔東選區，候選人梁美芬（鼠王芬）同選民力量「星屑醫生」歐陽英傑就班齊星級好友或黨友助選，搞到黃埔東部分地方擠得水洩不通，場面墟冚。
鼠王芬搵咗唱兒歌《小明上廣州》紅爆網絡嘅李家仁醫生、專業及資深行政人員協會創會會長容永祺及執業律師陳世強一齊企街站宣傳。李家仁話自己識咗鼠王芬十四年，上次區選已經幫過手做宣傳，但佢唔會當街唱兒歌拉票，因為街邊唔係唱歌嘅好地方喎。
星屑醫生就有人民力量立法會議員黃毓民助選壯大聲勢，佢哋企喺一架插住「人民力量，票債票償」嘅吉普車上拉票，毓民就攞住個大聲公同鼠王芬唱對台，但鼠王芬一於好少理，繼續專心拉票。至於同區另一候選人民主黨黃碧雲，聲勢較為輸蝕，尋日下晝三點幾都未見佢嘅蹤影，我哋問佢幾時到，佢就話落緊去現場喎。