政情：煲呔曾收紀念品「甩底」
煲呔曾早前參觀立法會新大樓期間，去到公眾席嗰陣「差錯腳」幾乎仆低，點知佢尋日去建築師學會周年論壇嗰陣又再出醜。話說佢喺活動開始前幾分鐘先至到場，致詞後，會長林光祺就向佢送紀念品。
致詞食老本 急腳鬆人
不過，唔知係煲呔曾揸唔實份紀念品，抑或係份紀念品太重，個底座忽然跌咗落地，搞到會長好尷尬，要勞煩在場人員幫手執番起個座。
煲呔曾致詞時，猛咁講番自己喺○七年施政報告提出嘅十大基建，又話四項基建都係跨境建設，未來最緊要努力研究點樣改善廣東省同本港嘅交通往來，但佢就冇提到幾時完工，又冇講點樣改善兩地交通往來，總之一味食老本，為自己賣膏藥。煲呔曾出席呢個活動，全程大約只逗留咗二十分鐘就急急腳鬆人，誠意有幾大真係路人皆見，就連現場記者想追問佢問題都冇機會。