政情：醫界選委戰炮聲隆隆
海外醫生免試來港工作觸及本港醫學界嘅神經，以醫學會為首嘅工會群起反對，據聞此舉同下月十一日嘅特首選舉委員會選舉有密切關係。當中近期曝光頻頻嘅醫學會會長蔡堅，據講係想一箭雙雕，既為選委亦為明年立法會醫學界選舉試票，而西醫工會楊超發亦自組名單加入戰團。相反由骨科醫生高永文組成嘅「七君子」鑽石名單相對理性溫和，未知會否較為蝕底。
醫管局同醫學界最近就是否聘請海外醫生鬧得面紅耳赤，蔡堅同立法會醫學界議員梁家騮更充當反對嘅「排頭兵」，幾乎隔幾日就開記者會或上電台節目發炮攻擊醫管局，尋日佢哋仲雙雙出席電台節目「一唱一和」，話擔心海外醫生嘅質素難以保證，聲勢可謂一時無兩。有知情人士估計，蔡堅如此雄心勃勃，全取醫學界三十席嘅意圖明顯不過。
知情人士透露，蔡堅最近動作多多四出拉攏業界醫生埋堆，爭取以高票當選醫學界選委，已經成為業界嘅公開秘密，但蔡堅嘅如意算盤係咪咁易打得響，仍存在變數。據聞多個陣營都想加入選委戰團，當中以高永文嘅七人鑽石名單最為星光熠熠，好似外科專科醫生朱建華、兒科顧問醫生周鎮邦、骨科專科醫生方津生等業界翹楚都喺名單之中，相信會有一定嘅支持。
楊超發郭家麒加入戰團
講到選舉，又點少得西醫工會楊超發及「關懷香港」郭家麒呢兩個選舉常客吖，據聞佢哋將各領軍一條名單參選，連同公共醫療醫生協會嘅名單，醫學界至少都有五張名單參選，真係亂過亂世佳人。醫委會最快喺本月底審批十名海外醫生免試來港工作，此時距離下月十一日選委會投票日只有約十日，各名單真係要審時度勢表達立場，否則隨時益咗對家就喊都無謂喇。