中環出更：孫女腳頭好 董太又拉頭馬
尋日周末風和日麗，沙田馬場出現唔少家庭樂畫面。福建社團聯會副會長董吳玲玲同老公董中浩，就帶埋大仔及兩歲孫女Molly一齊入場耍樂。近排拉頭馬拉到手軟嘅董太，繼續受到幸運之神眷顧，佢同先生名下嘅愛駒「翡翠明星」尋日首次上陣就大熱跑出，帶挈主人袋咗三十八萬獎金，認真抵錫。
喺馬場好出名？
董太笑稱，其實係孫女Molly好腳頭就真，事關只要Molly出場，拉頭馬嘅機會就會大增，仲話咪睇孫女人仔細細，其實佢喺馬場好出名架！點解？大家仲記唔記得，今年初董太名下另一匹愛駒「翡翠海星」，喺博愛醫院贊助嘅博愛盃賽事勝出，當日由博愛醫院主席頒獎畀時任仁濟醫院主席嘅董太，因而留下經典場面，而「翡翠海星」嘅英文名就係以孫女命名嘅「Jade Molly」喇！
講起董太嘅帝皇翡翠生意，佢笑稱未受經濟增長放緩影響。事關只要玉石嘅質素高，又係不可多得嘅奇貨，自然有識貨嘅捧場客啦！