咦，最近咁多風化案，有人撞胸非禮，有人淫辱親女，有人借醉強姦，會唔會同淫賤黎旗下鹹到出汁嘅《爽報》有關呢？你知啦，《爽報》為色中餓鬼提供心理上嘅意淫空間，一眾麻甩禽獸難免會心思思去宣洩生理上嘅邪惡本能。於是乎咯喎，有人誨淫誨盜，有人作奸犯科，攜手合作搞到滿城風雨雞犬不寧！
係呀，《爽報》真係誨淫誨盜㗎，自從今年九月創刊免費派通街以來，影視及娛樂事務管理處至今總共接獲一百九十七宗投訴，主要係聲討該報作風下流，侮辱女性，荼毒少年。至於淫褻物品審裁處，累計二十一次將《爽報》評為第二類不雅物品。簡單咁講，《爽報》創刊短短個幾月已經犯法二十一次，話佢係瘋狂犯罪分子絕無誇張成分。
問題係，香港自命為一個法治之區，因乜事幹唔將瘋狂犯罪分子繩之以法呢？如果話撞胸色魔係非禮個別途人，功夫茶會話《爽報》係一次過集體非禮所有香港人，淫賤黎固之然係大魔頭，助紂為虐嘅港府同樣係幫兇。
睇番往例吖，壹淫媒違反《淫褻及不雅物品管制條例》多達一百一十六宗，積犯案底纍纍厚過電話簿，哈，法庭居然次次都係輕輕罰款一萬幾千了事。假設有一個變態色魔，每次非禮婦孺甚至侵犯男人老狗都唔使坐監，淨係罰一萬大元算鬼數，而咁啱個變態色魔手上有一百萬，係咪等於佢有權干犯風化案一百次呢？好衰唔衰，淫賤黎窮得只剩下錢，法庭包庇縱容唔重罰吖嘛，呢條友仔咪有恃無恐囉，少少罰款當作經營成本，呢頭罰完嗰頭又去發放猥瑣下流嘅色情資訊。話佢非禮全人類都算客氣嘞，喺一片反對聲音之下繼續擇惡固執，直情就係強姦民意！
曾任淫褻物品審裁處審裁員嘅執業大律師龔靜儀就講得啱嘞，區區罰款對於《爽報》難起阻嚇作用，有人甚至會利用被評為不雅而大肆宣傳，所以應該修改相關法例，勒令不良傳媒停刊。冇錯嘞，不釘牌不足以懲治淫獸，正如立法會議員梁美芬話齋，《爽報》多次違例，政府應考慮頒發禁制令以及吊銷牌照。
由於《爽報》實在太離譜，所以有識之士大聲說不。好似收集到萬人聯署嘅「反爽報色情資訊行動」咁吖，積極呼籲「罷看、罷取及罷入屋」，藉此表達市民憤怒了。
唉，講真，淫賤黎背後如果冇港英餘孽撐腰，你估佢有冇咁大膽瘋狂犯罪吖嗱？所以話啫，《爽報》固然應該釘牌，港英餘孽都應該掃地出門，否則香港只會不斷沉淪！