九龍城區議會黃埔東係今屆區議會選舉焦點選區之一，尋日就有電視台搞咗場龍門陣，搵咗候選人梁美芬（鼠王芬）、民主黨黃碧雲及選民力量歐陽英傑（星屑醫生）先來一場牙骹戰，但點知鼠王芬就冇出席，現場以紙板公仔代替，相當搞笑之餘，亦無損龍門陣嘅精彩，星屑醫生重講唔停口，逼到主持要叉件西多士塞住佢把口！
人民力量一直都畀人激進嘅印象，但星屑醫生就自稱「立場堅定，態度溫柔」，反指黃碧雲因抗議小輪問題跳海擾民，黃碧雲就即刻縮沙話自己不熟水性，澄清跳海嗰個唔係佢。黃碧雲更反插「空降」嘅星屑醫生唔了解區內問題，傳單竟然話區內有「屏封樓」問題，但星屑醫生就辯稱用個「封」字係用緊形象表達，係文學嘅表現喎。
雖然鼠王芬冇到，但節目就放咗佢嘅紙板公仔坐鎮，無論大家點樣指住佢嚟鬧，佢都露出燦爛笑容，反而辛苦咗隔籬嘅黃碧雲，事關佢明知個位無人，但次次「鼠王芬」畀人鬧時，黃碧雲都偷望身邊空櫈，不時煞有介事話：「你唔係話我，你話佢（鼠王芬）咋話？」