政情：田少頻落區誓取山頂
港島中西區山頂選區可以話係今屆區議會選舉焦點戰場之一，究竟係公民黨陳淑莊（Tanya）可以成功衞冕，定係自由黨陳浩濂（Joseph）一戰成名呢？過兩日就知道。不過，自由黨榮譽主席田北俊就當正選立法會咁打，差唔多日日去山頂區陪Joseph向選民揮手。
田少話咁緊張，係因為山頂有標誌性意義，如果贏咗，即係話唔少中產都認同自由黨，所以山頂係不可被攻陷嘅橋頭堡。田少仲好牙擦話，山頂乜人都有，有專業人士、商界代表、高官等，所以派米、搞荔枝團等統統無用，最緊要都係候選人嘅能力同往績。佢仲話，經過一個月密集式落區，相信支持度已經過咗一半喎。
面對自由黨總動員出擊，Tanya亦唔敢掉以輕心，日日拉票十個鐘，非常落力，佢話現時唔敢評估形勢，因為山頂選民好有禮貌，鍾唔鍾意都會笑笑口，所以好難知道選民個心諗緊乜，但佢有信心選民會揀個識做嘢嘅議員。睇嚟今次山頂選區戰果，將會係兩大黨支持度嘅寒暑表。