中環出更：王子訪港鋼琴魔指獻技
英國愛德華王子旋風式訪港，過去幾日王子畀足面撐香港青年獎勵計劃（AYP），前晚現身AYP五十周年慈善晚宴後，尋日又出席新世界第三代接班人鄭志剛一手湊大嘅尖沙咀K11購物藝術館，為藝術展覽揭幕。前晚周年晚宴更掀起高潮，逾五百位政商名人到場一睹王子風采外，當晚仲請到年僅廿二歲嘅「鋼琴魔指」薛嘯秋表演獨奏。
薛嘯秋獨奏令嘉賓聽到入晒神，風采不亞於同門師兄李雲迪，令王子見識到青年人嘅無限潛能。薛嘯秋係四川音樂學院嘅學生，其手指如有魔法，可於琴鍵上極速舞動而又不失準。與其他嘅音樂天才一樣，嘯秋年紀輕輕就開始習琴，佢五歲嘅時候隨父母進入樂器店，以為店內統統都係玩具，仲要挑選最大最貴嘅，結果就此跟鋼琴結下不解緣。
雖然嘯秋自小有音樂教師教授琴藝，但佢對於指定練習嘅樂章不感興趣，反而卡通動畫嘅歌曲一聽就懂，毋須樂譜亦可倒背如流。
薛嘯秋努力博女生注意
然而，擁有音樂天分還需刻苦鍛煉方成大器，嘯秋話令佢努力習琴嘅其中一個動力，係博取女生嘅注意，而呢個方法都好奏效架，但可惜至今佢嘅感情生活還是空白一片，主要因為太過忙碌，除咗工作與學業兩兼顧，還要頻繁往來中港台。
晚宴上，王子變萬人迷，女嘉賓爭住同佢合照，王子風度十足，來者不拒，更喺致詞時主動講笑話搞氣氛。前民政事務局常秘李麗娟胞妹李桂蘭（Olivia）都係座上客，佢大讚王子夠親民，Olivia就按照英國皇室傳統，向王子下跪問安，氹得王子好開心，報以欣賞嘅笑容。
卓妮