政情：白鴿總部死鴿唔老利
區議會選舉如箭在弦，各大黨派正盡最後努力拉票，但民主黨（白鴿黨）拉票之餘更呈現凶兆。有讀者報料，話三日前喺太子白鴿黨總部樓層對出嘅冷氣機槽平台，發現咗隻白鴿屍體，而且睇嚟只係死咗冇耐，都咪話唔邪門。除咗影響環境衞生外，相信班黨高層同該黨嘅區會候選人都會感到唔老利，莫非死白鴿係預兆白鴿黨選情凶多吉少？
講到選情危危乎，其實都有迹可尋。雖然白鴿黨一直被譽為泛民主派第一大黨，但近年聲勢已大不如前，而且不時仲爆出醜聞令黨丟架，好似立法會議員甘乃威被揭發涉嫌求愛不遂炒女助理事件，及至今年暑假期間，時任黨總幹事嘅陳家偉被本報獨家踢爆涉嫌到鳳樓尋歡，雖然佢事後堅稱只係「訪談」，但最後都係倉皇決定退黨。
此外，白鴿黨亦因為去年支持二○一二政改方案，被人民力量日鬧夜鬧佢哋出賣民主，嚟緊區議會仲有三十幾個區會選區畀人民力量狙擊，喺內憂外患下，區選選情真係危危乎。同甘乃威一樣參選中西區上環選區嘅仲有人民力量嚴達明及無黨派陳賢豪。