政情：CY范太八和碰頭唐唐冇動靜
兩大疑似特首候選人梁振英（CY）同范徐麗泰尋日喺八和會館就職禮上碰頭，兩人仲喺台上握手添，其中CY係八和會館嘅顧問。而另一疑似特首候選人唐英年尋日就無出席公開活動。
喺去八和會館前，范太出席咗香港社會服務聯會主辦嘅社會發展論壇，呢個論壇大有來頭，之前梁振英同唐英年都分別出席過，兩位雖然都有受到在場與會人士質問，但總體氣氛尚算良好，不過，來自社區發展陣線嘅吳先生對范太似乎就唔太客氣，一開聲就質疑范太係以乜嘢身份出席，批評佢左諗右諗。佢仲話，范太成日「猶抱琵琶半遮面」，咁樣真係唔係幾好，如果想選的話，唔該落落大方認咗佢喎。
范太都話，明白成日左搖右擺會令人不滿，亦有可能令民望下跌，但特首一職極為重要，希望大家畀多啲時間佢想清楚，佢又話，今年內相信可以公布決定，絕對唔會受中央影響決定。