中環出更：四叔三父子現身北大主禮
人稱「四叔」嘅恒基地產主席李兆基，近期屋企人丁旺盛，眨吓眼已有六個寶貝孫仔孫女，難怪佢辭晒旗下三十幾個公司嘅職務，以便抽出多啲時間湊孫為樂。不過，一向樂善好施嘅四叔，並無忘記繼續支持教育。
李兆基人文學苑開幕
上周四佢同兩個仔家傑、家誠現身北京大學校園，主持佢捐贈兩億元人民幣（約二億四千萬港元）興建嘅「李兆基人文學苑」落成開幕儀式。
四叔話，佢做善事鍾意以多取勝，即係愈多人受惠愈好，事關捐助學校作育英才，得益嘅唔止學生本人，更可相傳至下一代。卓妮都聽過四叔講過呢個理念，如果培育咗一個好官，天下百姓都可受益，四叔果然係深思熟慮。