開講都有話，物先腐然後蟲生。既然係咁，自稱國際大都會嘅香港居然木蝨為患，反映乜嘢問題呢？唉，腐敗囉！
木蝨呢家嘢，唔係講笑㗎，事關木蝨係吸血害人精，咬頸叮腳會搞到你周身唔聚財。呢嗱嗱嗱，沙田區居民李太最近就飽受折磨嘞，今年六月新居入伙前喺一間大型傢俬連鎖店購入兩張木架床，用咗唔夠三個月，不斷有木蝨從床架鑽出爬來爬去，李太話呀：「拉開枕頭套、床套，一大堆木蝨即時湧晒出嚟，令人毛管戙。」
至於石硤尾邨咯喎，災情更加嚴重。邨內一位婆婆向記者透露，木蝨攻陷整個衣櫃，佢老人家被迫將衣櫃之內部分衣物丟棄，噴完殺蟲水情況都冇乜改善。同區一間藥房負責人就話嘞，殺蟲產品銷量大增，滅蝨劑近兩個月賣出接近一百盒，係去年同期嘅六倍，甚至有街坊連續三日幫襯，足見蝨患嚴重。
食物環境衞生署收到木蝨投訴以及求助個案急升，滅蟲協會接獲求助由四年前全年一宗增至近期每月十幾宗。因乜事幹木蝨會攻陷香港嘅呢？計功夫茶話齋，主要係兩大原因。首先，全球一體化吖嘛，人流周圍走，物流四處去，木蝨咪搭順風車自由行囉。其次，香港嘅清潔運動相當失敗，而防蟲工作更加係乏善足陳。
嗱，食環署轄下有一個防治蟲鼠組，顧名思義當然係負責消滅害蟲同老鼠。不過可惜吖，呢一個組嘅效率簡直不敢恭維，人哋廣州鼠王單人匹馬一晚可以捉到十幾隻大老鼠，佢哋人多勢眾一星期都未必捉到一隻。由於滅鼠不力，中環曾經有老鼠咬傷外國女遊客，香港淪為國際笑柄。求助食環署平息蝨患，有乜嘢用呢？
俗語有云，一物治一物，糯米治木蝨。木蝨肆虐圍城吸血，香港急切需要糯米。之不過咁，橫睇掂睇特區政府冇乜邊個似糯米，極其量只係似飯桶。好似考慮參選特首嘅唐英年咁吖，明明去拜訪小學，居然問校長「入大學率係幾多」。喂，難道小學生唔使讀中學，一嘢直接讀大學？如果特首跑馬仔遊戲揭盅真係由一個飯桶當家作主，全香港簡直捉蟲！
有人可能會話，防治木蝨可以從把關做起，拒絕帶有蟲患嘅傢俬入境咪得囉。理論上講得通，實際上冇可能。你知啦，香港邊防人員冇嘢叻，最叻係走漏眼，連內地大肚婆咁巨型嘅生物都可以如入無人之境，小小木蝨自然出入平安。
急需糯米治木蝨，奈何防蟲無一物。各位街坊街里，都係買多幾支滅蝨劑看門口穩陣少少。