政情：立法會舊大樓正式關閉

尋日公民起動立法會議員何秀蘭專登趁舊大樓關門前最後一日，走咗返去影相留念，跟住仲擺咗兩張剪影相（圖）喺社交網站facebook公諸同好，佢自己都感嘆，呢個行為確實太過感性，但究其原因，都係佢太唔捨得舊大樓之故。

據聞其他議員早就執好晒自己啲私人物品，所以尋日無乜人好似何秀蘭咁，特地返去舊大樓道別。雖然舊大樓今日開始關閉，連立法會嘅保安都會撤走，不過市民大眾想喺舊大樓外面影結婚相、畢業相等，都依然係得嘅。依家大樓嘅屋主仲係立法會，直至呢個月嘅下旬拆走晒所有器材、設施為止。