政情：舊相當新用 黃成智扮後生

民主黨立法會議員黃成智喺北區彩園出選，有人就唔滿意佢「扮後生」，用四年前嘅相印喺單張度，民主黨網頁上嘅相，一樣係咁後生。黃成智回覆時就話，雖然選管局有規定候選人要用近半年影嘅相，但就只限選管局寄畀選民嘅候選人簡介，個人嘅宣傳品就不在此限。黃成智仲話，如果佢鍾意嘅話，畫自己個樣出嚟寄畀班選民都仲得，又話自己日日都喺街接觸市民，唔使用番四年前張相遮嚟遮去喎。

啲候選人計數計得咁盡，當係唔會觸犯選舉法例，不過咁做有冇誤導選民，就見仁見智喇，依佢咁講，用張再後生卅年嘅相印喺單張度，都唔犯法喇。彩園選區另外兩位候選人係人民力量區維綱同民建聯蘇西智。

梁文斌政綱　四年後隻字不改

離譜嘅候選人仲有將舊料循環再用，認真「環保」。有選民投訴，新界西屯門山景選區候選人梁文斌四年前曾經參選過區議會，但就不敵現任區議員兼對手吳觀鴻。即使係咁，但梁文斌似乎無從上次落敗吸取教訓，四年後嘅宣傳單張內容竟然同四年前一樣隻字不改。喺「我的政綱」入面，六個項目包括醫療衞生、治安等方面嘅政綱都一字不漏咁照抄。仲有，單張入面嘅相幾乎全部同之前一樣，有選民話畀我哋聽，相中間清潔公司已經換咗好耐，真係唔知呢位候選人製作份宣傳單張嘅時候，有無做吓資料搜集。

梁文斌回覆時直認不諱，話雖然入面啲資料係一樣，但係張封面相都有唔同㗎。佢又話贏輸唔緊要，最重要係可以服務區內居民喎。連選舉工程都做到咁是但，又邊有機會勝出為居民服務呢？佢今次嘅對手，又係吳觀鴻。

今次選舉選情嚴峻，唔少候選人都話自己曾經畀人惡意攻擊，有候選人就特意印製一份「十大不文明選舉行為」嘅宣傳單張，希望選民可以幫手制止呢啲不文明行為。「十大不文明選舉行為」包括向唔同政見嘅人士吐口水、用粗言穢語問候對方嘅父母、請人派抹黑單張，跟住就話畀人抹黑等。呢個較創新嘅選舉手法，唔知選民受唔受落呢？