中環出更：許照中教股民 切記持盈保泰
近期股市驟升驟跌令人睇唔通透，唔少股民喺股海迷航，唔知點算。啱啱出資與六福集團等股東合設六福金融，並出任主席兼行政總裁嘅許照中（Stephen），勸喻股民此刻要持盈保泰，千祈咪輸晒本錢。仲笑稱股市日日都開，最驚係人哋玩得開心時，自己冇得玩。
Stephen縱橫股壇幾十年，係名副其實嘅老行尊，機場管理局行政總裁許漢忠（Stanley）係佢細佬，許家一門雙傑，認真唔簡單。Stephen話，依家市況唔明朗，股民要謹記持盈保泰。若果股市反彈唔使開心住，回落都唔使咁難受，事關股市日日都開，最驚彈盡糧絕，人哋玩得盡興你卻冇份玩。佢形容得好貼切，口才一流，盡顯日日寫文章練出來嘅真功夫。
力撐細佬起跑道
不過Stephen笑稱自己口沒遮攔，唔似細佬Stanley咁文靜，又話細佬平時唔多講嘢，叫大家多啲關照佢喎！咁仲未夠，佢又話機場一定要起新跑道，事關香港要發展，唔可以乜都唔做。見佢一輪嘴力撐細佬，就知佢哋兄弟情深喇！