所謂能醫不自醫，公共醫療百病叢生，藥石無靈。其他唔講，就講公立醫院嘅醫護逃亡潮吖，止唔到血不在話下，傷口仲不斷惡化擴大，再咁落去，血流不止，遲早搞出人命！
繼其他科之後，公立醫院逃亡潮終於蔓延到麻醉科。聯合醫院同瑪麗醫院最近都有麻醉科主管轉投私家醫院，前者過檔做院長，後者跳槽大展拳腳，令公立醫院資深醫生買少見少。呢，瑪麗醫院證實，麻醉科本來有三十名醫生，過去半年已有四人離職，流失率超過一成。聯合醫院亦唔好得去邊，廿九名麻醉科醫生走咗三件。
麻醉科醫生走吓一個又一個，醫管局可能已經麻木晒。不過，醫學界就相當擔心，直斥港府漠視資深醫護流失，長遠只會令到整體公共醫療質素下降，最終受害嘅係冇錢光顧私家醫院嘅普羅病人。
話時話，公立醫院醫護大量失血，早已變成陳年痼疾，內科、急症室、兒科、放射科……一一相繼淪陷，依家連麻醉科都失守，咁搞法，遲早搞出人命嘅咋。嗱嗱嗱，公立醫院醫護人手嚴重短缺，日日做到氣咳，手忙腳亂之下，真係分分鐘造成醫療事故，搞出人命o架！
最好笑嘅係，當局對醫護大逃亡無計可施，惟有提出招聘海外醫生，想搵外援打救。點不知，大計甫出台，即被本地醫生組織打窒，企硬反對。食衞局局長周一嶽平日好威武o架，病房收費話加就加，自費藥物名冊話推就推，話之你民怨沸騰，之但係今次咯喎，投鼠忌器，諱疾忌醫，變咗一隻縮頭烏龜。
即係咁，本地醫生從自身利益出發，拒開城門延納海外醫生，可以話係人之常情，問題係當局點樣收拾醫護荒呢個爛攤子呢？須知遠水難救近火，培訓一個專科醫生至少都要十年八載，公立醫院呢幾年咪要年年擺空城計？定係叫市民有病走去飲符水、種生基呀？萬一到時搞到周街都係無恥神醫神棍，咁就該煨囉！
講嚟講去，公共醫療鬧醫護荒，罪魁禍首就係港府。當局鼠目寸光，好慳唔慳，早年大削培訓醫護名額，搞到醫護人手六個蓋冚十個煲。仲有吖，港府唔止渾噩，仲係心盲，無視醫護人士不足現實，竟然盲目鼓吹醫療產業，私家醫院不斷膨脹，不斷向公立醫院挖角，搞到醫護荒問題雪上加霜。所以話啫，公共醫療體系乜都缺，床位缺，儀器缺，醫院缺，醫生缺，護士缺，最唔缺嘅偏偏就係醫療庸官。
功夫茶有時忽發奇想，如果一早幫呢班庸官一個二個打晒麻醉針，等佢哋大覺瞓冇得亂搞一通嘅話，本港公共醫療體系或者就唔使搞到千瘡百孔，烏煙瘴氣，病入膏肓。