政情：李繼堯教浸院凡事通報
浸會醫院醫護人員接生「甩手」，將初生嬰跌落地嘅事件令全城嘩然，事後醫院同衞生署就需唔需要即時通報各執一詞，令人質疑通報機制欠清晰。不過，仁安醫院院長李繼堯就有一番見解，佢話好難將所有事故寫晒入通報機制，所以私院要識得自行判斷喎。
李繼堯解釋，一般人可能認為病人死亡或斷手斷腳先至叫做嚴重，但好似ＢＢ仔撼親個頭咁，真係可大可小，亦未必即刻睇到嚴重性，所以最穩陣都係報咗先，由衞生署決定屬唔屬於嚴重，聽落似乎有啲教精浸會嘅味道喎。
李又指，自己一向秉持一個原則，凡係影響到醫護人員同病人安全嘅都要報，事關衞生署好多時只係想得個知字，最好醫院已經檢討埋原因同改善措施，懲罰反而係次要。佢又話呢個年代醫院都係「自爆」好啲，果然有料到。