政情：陳茂波遭左右眼疾夾擊
盛傳會為其中一位疑似特首候選人助選嘅會計界立法會議員陳茂波（Paul），前排忽然眼紅，但佢唔係妒忌人哋嗰種「眼紅」，而係其右眼真係爆咗微絲血管。直到尋日佢終於抽到時間去咗眼科醫生林順潮度診治，經過詳細檢查之後，仲發現左眼生眼瘡，好彩唔算係大問題，只要滴番啲眼藥水就可以根治。
其實阿Paul年紀都唔細，係時候要着重一下健康，連佢自己都發覺，實在唔能夠再長期望住電腦做嘢，有陣時望得耐，真係要起身郁動吓至得。話時話，原來阿Paul嘅近視都幾嚴重，兩隻眼都有七百幾、八百度近視，依家仲要有成一百度老花，冇咗個眼鏡肯定會盲摸摸。
阿Paul話，本來佢諗過配兩款眼鏡，一款用嚟睇近嘢，另一副就用嚟睇遠嘢，可惜工作太纏身，令佢無法子抽空去配眼鏡，所以咪一直戴住副舊眼鏡囉。其實佢工作咁繁忙，換眼鏡都唔係咁方便，可考慮配一個漸進眼鏡，一個眼鏡睇遠近搞掂晒。