政情：CY晤壓力團體唐唐落區探訪
兩名疑似特首候選人梁振英（ＣＹ）及唐英年（唐唐）尋日分頭出動「備選」。其中ＣＹ去咗港大同「爭取全民退休保障聯席」成員閉門會面，不過佢喺開會前先小人後君子，強調「我唔會做黃大仙」，佢雖然支持社會討論全民退休保障計劃，但唔代表佢一定或無條件支持實行，自言唔會為咗討好選民而亂開選舉期票。
根據聯席成員引述，ＣＹ喺會上亦一如佢所講，對全民退保表示保留，話擔心需要增加稅收，亦要考慮有冇必要保障埋有一定積蓄嘅退休人士。問及下屆政府係咪起碼要開始做諮詢，佢亦推說諮詢要有目的咁去做。會上亦談及下屆政府應否為《基本法》第廿三條立法，ＣＹ就話要睇政治條件，唔需要急住去做。聯席成員會形容ＣＹ態度都幾誠懇，佢哋稍後會擇日同唐唐會面。
此外，城大校長郭位尋日發表公開信，對ＣＹ離任城大校董會主席表示惋惜同不捨，又讚揚ＣＹ高瞻遠矚，係一位非常出色嘅領袖，祝願對方諸事順遂，更創佳績。
唐唐尋日朝早去咗協康會柴灣環翠中心，探訪啲喺學習同發展方面有困難嘅兒童，並同佢哋嘅家長、社工、老師同言語治療師傾談，不過有關活動事前並無通知傳媒，只係事後發稿了事。