政情：健波大師幫立會主席轉運
立法會最近可謂多事之秋，先有工人因趕工受傷流下第一滴血，立法會秘書處又被指控收緊新聞自由，不分黨派嘅議員都動腦筋想為立法會轉運。有多名議員最近有機會去立法會主席辦公室開會時，一睇個格局就搖頭嘆息，聲言唔多妥當，建議主席執位改運，好在主席都唔係死硬派，肯聽吓意見。不過，究竟議員嘅迷信係咪可以改變立法會嘅運勢，就有待時間印證喇！
新立法會大樓自啟用後頭頭碰着黑，好似最近仲發生煲呔曾突然向人民力量黃毓民發爛渣事件，搞到主席誤判聲援毓民嘅社民連「長毛」梁國雄離場。主席為咗平息各方質疑，即時分批約見泛民主派同建制派。據聞十多名建制派同主席曾鈺成見面時，保險界陳健波直覺主席辦公室擺位有啲唔妥，深感不妙，先後兩次主動建議主席執執個座位擺位。
有靠山先至好
健波認為，主席座位應該靠住牆身、望向海，而非背住個海坐，多名建制派議員都認同健波嘅睇法，其中會計界陳茂波臨走前仲提醒主席，要聽聽健波嘅執位建議喎。究竟健波點解突然風水大師上身，對風水命理咁有研究呢？
自言唔識風水嘅健波話，佢當時入到主席間房時覺得好唔妥，因為主席原先個座位後面係個海，而且後面仲有好多建築天秤、吊雞等飛來飛去，如果按照風水基本原則嚟講，座位後面應該背後有啲靠山先至好，但當時不但冇靠山，而且仲要動土唔安寧，所以就提出不如執一執位，變成靠住個牆望住個海坐。佢仲打趣話如果主席唔掂嘅話，佢哋啲議員都唔掂喎！
據講曾鈺成已喺尋日下午着職員搬過晒啲擺位，但新擺位係咪對以後有利，就要有待印證。話時話，如果議員嘅迷信可以令立法會轉運，真係何樂而不為，但其實講到尾最緊要係六十名議員醒醒定定，上下一心做好監督政府施政嘅工作，否則風水幾好都冇用，立法會只會繼續成為是非不絕之地。