中環出更：郭炳湘淺談政客婚外情
新鴻基地產非執行董事郭炳湘（Walter）年初自資成立「郭炳湘慈善基金」，尋日正式宣布同香港大學成立獎學金，每年資助兩名港大優秀畢業生，到牛津大學布拉瓦尼克政治學院修讀一年公共政策碩士課程，每個學生將獲約五萬英鎊（約六十萬港元）嘅資助。Walter聯同港大校長徐立之、牛津大學布拉瓦尼克政治學院院長林奈莉一齊見證獎學金成立。
Walter早前因為「紅顏知己」事件搞到好唔得閒，對於近日有疑似特首候選人爆出有婚外情，Walter就輕描淡寫話，以往政壇都證明私生活唔一定影響政績，最緊要睇個人嘅政綱、團隊及領導能力，佢仲話：「過去嘅嘢我哋唔好再講喇，我哋要向前看。」
成立獎學金 不排除加碼
講番今次成立嘅獎學金，Walter直言，以往香港唔係太注重政治，但自從九七回歸，加上嚟緊一七年特首普選及二○年立法會普選，香港實在需要更多政治領袖，帶動香港政制發展。佢話獎學金仲係處於嘗試嘅階段，未來可能會加碼開多個PPE（Politics,Philosophy,Economics）學士課程獎學金，為香港培育更多未來領袖。