中環出更：設計芭比靚衫 郭培續奇緣
本身係美麗化身嘅Barbie，相信係每個女性兒時最夢寐以求嘅玩偶。時代廣場將會喺下個月中開始舉辦「Barbie聖誕派對」展覽，展出由中國著名高級時裝設計師郭培設計嘅「童夢奇緣」系列，為Barbie同Ken呢一對金童玉女訂製出十二套華麗嘅Haute Couture高級時裝，氣派十足。
本身都係靚女嘅郭培，已經有近廿年嘅設計經驗，歷年來喺世界各地獲獎無數，今次作品將色彩、紋理同剪裁巧妙地融合，成功喺世界時裝舞台引起一片驚艷之聲。原來佢設計「童夢奇緣」嘅時候都經歷緊「奇緣」，就係有咗BB喇，佢形容當時小生命喺肚入面躍動，令佢感到無比嘅快樂，所以設計時裝嘅時候，靈感就一點一滴由內而外咁傾瀉出嚟。
多個場景 不同感覺
今次展覽由郭培做埋創作指導，第一層係佢精心設計嘅五間小屋，用上粉紅燈泡及成千上萬嘅Barbie小飾物、小鞋子同小手袋造成嘅聖誕掛飾，令人擺脫冬夜寒冷，倍感溫暖。上到第二層，大家會被百個禮物盒圍住，盒內放滿Barbie嘅小家具同圖騰。行到中庭，就會見到郭培為芭比設計嘅夢想之家同華麗嘅高級時裝。鍾意Barbie嘅朋友如果見到，一定會興奮到手舞足蹈呢！
