政情：女神童忽然唔想做醫生
有望做最年輕醫生嘅中大女神童何凱琳，近日毅然轉系，九月起轉讀中大心理系一年級。放棄幾年苦功，有網友爆料話凱琳過去幾年讀得好吃力，面對醫科艱深嘅課程，成績只屬一般。中大發言人尋日話，凱琳喺修讀內外全科醫學士課程及接觸臨床工作後，發現其志趣唔喺醫科，反而對心理學有濃厚興趣喎。
以十六歲之齡獲中大醫學院破格取錄嘅九優狀元何凱琳，被視為可造之材，佢亦曾立志倣效沙士英雄、現任中大校長沈祖堯，懸壺濟世，點知依家先話對醫科冇興趣，令唔少人跌晒眼鏡，事關投放嘅資源都唔少。據講凱琳經過與家人及中大醫學院院長霍泰輝商量後，正式決定轉系，仲唔介意由一年級生讀起，聽聞佢已投入心理學課堂中，適應得好快。