政情：CY演講 唐唐搬竇 范太訪京

辭咗政務司司長一職成個月嘅唐英年，尋日開始搬屋，將佢嘅細軟搬離白加道官邸，只見有工人將一共十幾袋嘅意大利男士高級時裝Zegna嘅紙袋搬上車，又運走一大疊用衣架掛住嘅長褲，仲有兩架搬運公司嘅大貨車運咗好多「吉」嘅紙皮箱入去，睇怕都係將屋內嘅衣物用具裝箱。唐唐需於本月卅日之前，將官邸交還。

CY尋日就去咗一間中學進行演講，佢勉勵學生做人除咗要關懷身邊嘅人之外，地球上仲有好多人都值得佢哋去關懷。CY尋日用英文發言，同學生講做人最緊要識得三個C，當中包括係「competition（競爭）」、「connectiveness（聯繫）」同「care（關懷）」，不過佢將第一個字讀咗「completion（完成）」，差啲跟唔到佢嘅講話內容。事後CY被問到點睇六四事件時，佢就猛咁話自己以前發表過意見，現時無嘢補充，記者幾次追問都係收到同一答案。話時話，CY作為城大校董會主席嘅任期，已經喺上星期三屆滿，城大話，CY嘅空缺暫時由柯清輝署任。

大批工人運紙皮箱入去官邸，相信唐唐就嚟搬離白加道。

唐太返回官邸，唔知係咪為搬屋打點。（溫國佳攝）

至於范太，尋日佢飛去北京開人大常委會，要到星期六先返港。梁、唐二人周三會再出席一個IT界研討會，但被安排喺唔同時段出場，唔知到時兩人會唔會有機會碰頭呢。