政情：議員大合照鬥博出位
立法會新大樓啟用後，一班議員尋日就齊集地下大堂影番幅大合照，各議員都悉心打扮。梗係啦，明年立法會就換屆，有冇得留低都未知，影番幅相留念好緊要o架。好似議員陳淑莊同旅遊界謝偉俊就一個桃紅色、一個鮮藍色，加埋坐喺第一排嘅民主黨副主席劉慧卿嘅鮮紅套裝，組成一個鮮色鐵三角，非常搶眼。
諗住一齊組新工黨嘅李卓人、何秀蘭及梁耀忠就一齊着「六四」廿二周年T恤影相，據講連特首辦主任梁卓偉都話佢件Tee夠搶眼。影集體相一般按高度排位，但如果想同黨友仔一齊企但又唔夠高，咁點算好呢？攝影師就好細心拎住啲紙皮，諗住畀議員墊高企，但有議員就耍手擰頭話唔要，究竟邊個有墊高，邊個唔使墊？大家自己估吓喇！
不過，細心睇吓幅大合照，就會發現唔齊人，社民連「長毛」梁國雄，人民力量黃毓民同陳偉業等人都無晒影。不過，唔緊要啦，立法會秘書處可以向政府新聞處學嘢，好似影行政會議大合照咁，整幅合成照咪得囉！