唔識用iTunes及Apps
沈校長喺網誌話，佢無iPhone同iPod，唯一有嘅iPad，都係朋友送嘅，佢甚至唔識用iTunes同林林總總嘅Apps。雖然係咁，佢都喺喬布斯身上學到三樣嘢，包括係做人唔好隨波逐流，要締造自己嘅價值及世界、熱愛自己所做嘅事，終身投入、仲有要保持樂觀，對準目標，時刻同團隊密切合作。
雖然咁尊敬教主，但沈校長咁多年來只買過一件Apple產品，就係喺八九年寫論文時，用第一代電腦去寫，呢部老爺電腦仲留喺佢屋企。所以佢呢個時候寫網誌向喬布斯致敬，難免予人有少少抽水嘅味道，好彩佢一開始講明，喬布斯係佢喺通識教育課「偉人與偉論」中經常引用嘅人物，都算係講得通啦！