政情：龜縮周一鑊枉為父母官
自從醫院管理局今年「落閘」，拒絕港人內地配偶喺本港公立醫院分娩後，好多中港家庭團體都紛紛團結起來抗爭，向食物及衞生局局長周一嶽表達不滿。周一鑊尋日出席公開活動時又遇到請願，但佢好學唔學，竟然學煲呔曾咁玩龜縮，堂堂局長唔敢面對群眾不特止，仲「走後門」迴避反對聲音，事後又發表聲明譴責示威者嘅過激行動，認真不知羞恥。
話說醫管局今年四月宣布，提早停收內地孕婦喺公立醫院分娩，尋日就有十多個不滿政策嘅中港家庭權益會代表，趁周一鑊去理工大學出席研討會時喺場外示威，眾人手持橫額，高呼「港人內地配偶慘被排斥」、「政府製造社會分化」等口號，諗住就港人內地配偶預留分娩床位訴求，向周一鑊遞交請願信並直接對話。
原本遞交請願信呢啲環節好平常，行動亦唔見得激烈，但喺會場外守候多時嘅示威者遲遲未見周一鑊到場，後來先至知道佢已經由後門靜靜雞入場，原本只想和平表達意見嘅示威者情緒旋即變得激動，部分示威者包括孕婦同小孩更忍唔住衝入會場抗議，結果同在場保安及工作人員互相推撞，場面混亂不堪，有示威者成功突破防線衝上台遞交請願信。
逃避反對聲音 推莊卸膊
至於周一鑊，當然係藉詞離開啦，佢由大批保安同警員護送下，再次抱頭鼠竄走後門鬆人。身為父母官，為咗逃避反對聲音走後門已經夠衰，詎料周一鑊事後仲發表聲明，譴責請願者強行入場，影響活動進行，話對此感到遺憾喎。佢又推莊話，以往已經多次會晤相關團體及聽取意見，總之就係話自己乜都啱晒，人哋乜都錯晒啦！
香港市民同政界人士對港人內地配偶能否喺香港公立醫院分娩，至今仍然意見紛紜，作為父母官點都唔應該漠視反對聲音，人哋都係為個家啫，使唔使咁對人先？中港家庭權益會組織者曾冠榮強調，示威者喺場外佇立良久，局長不理不睬，衝入會場抗爭迫不得已。如果周一鑊當時肯接信同傾幾句，件事根本就唔會發生！