中環出更：傳過檔恒隆陳碧鏵封嘴
卓妮日前爆料，話因出售客戶資料圖利黯然落台嘅前八達通行政總裁陳碧鏵，本月底劈炮無綫電視份工後，傳佢下月會過檔恒隆地產。卓妮日前就喺香港管理專業協會一個活動上見到陳碧鏵，諗住等佢親身回應呢個傳聞啦，點知佢唔承認亦唔否認，總之唔肯回應，只係話自己離開無綫後好忙，要離港一段時間喎。
卓妮當日喺活動上見到陳碧鏵嘅心情勁靚，笑容滿臉，問佢係咪過檔恒隆地產幫陳啟宗打工，佢就話︰「傳聞嘅嘢唔作回應喇。」不過，佢承認今個月底就會離開無綫，派卡片時仲同人講︰「呢張卡片月尾就過期架喇！」
至於離職無綫後有乜打算，陳碧鏵只係話遲啲要搞屋企搬屋嘅嘢，又要飛去澳洲探望喺嗰邊讀書嘅囝囝，到時順便叉叉電輕鬆吓，應該都會好忙喎，其他嘅嘢就等返香港之後再打算咁話。