唔好怪功夫茶長氣，真係有必要苦口婆心講多次，大家保重身體，千祈唔好有病，一病就好鬼死頭痛。假如你一不小心打敗仗要去公立醫院，面臨嘅風險係醫死人，屯門醫院最近先至有一筆「手術成功、病人死亡」嘅糊塗帳。至於私家醫院咯喎，最大風險係冇錢埋單，事關多間私家醫院喺賺大錢嘅情況之下仍然勢兇夾狼大幅加價。
有一個叫關懷香港嘅組織，翻查公司註冊署嘅網上查冊中心資料，發現浸會醫院○九及一○年嘅經濟收益分別係三億五千萬元及二億八千萬元，財政儲備高達二十一億元同二十四億元。聖德肋撒醫院○九年經濟收益四億五千萬元，財政儲備二十億元。聖保祿醫院○九年經濟收益八千九百萬元，財政儲備六億元。
全港有十三間私家醫院，除咗浸會、聖保祿同聖德肋撒之外，其他又點呢？唔好意思，帳目保密，冇公開畀公眾查閱。
功夫茶提提大家，部分私家醫院以非牟利名義經營，唔使交稅㗎，幾鬼過癮呀。難怪關懷香港召集人郭家麒批評，三間醫院財政儲備仲有咁多，加價分明係搶病人錢。
私家醫院加價有幾兇狠呢？聖德肋撒上月全面加價，造影檢查加幅一倍半，部分手術費加價六成，房租加價百分之五點五至六點五。以產科套餐為例，香港港安醫院加價百分之五至八，荃灣港安加價百分之二至五，寶血醫院加價超過一成。
唉，負責監管嘅衞生署簡直就係一隻冇牙老虎，而且屬於病貓一類。私家醫院話就話受到《醫院、護養院及留產院註冊條例》規範，但係財政狀況不受管制。即係話，政府對於加價問題處於一個零監管嘅廢柴狀態。
講真吖，如果政府有決心管一管，其實冇可能管唔到，即使唔直接監管，都可以間接限制加價。譬如話，政府容許興建更多私家醫院，壟斷局面好容易就會打破，傻仔都唔敢亂咁加價趕客。之不過問題係，官僚作風當然懶得就懶。
呢嗱嗱嗱，曾蔭權講過要發展醫療產業，兩年前施政報告已經話有四幅土地可以增建私家醫院，如果病人選擇多咗，加風理論上可以遏止。弊就弊在曾氏作風永遠係吹水唔抹嘴，食物及衞生局左拖拖右拉拉，啱啱先至決定明年初推出黃竹坑同大埔兩幅私家醫院用地公開招標，另外兩幅地皮影都未見。
所以話啫，既然政府做咗病貓，市民就唔好做病人，真係好鬼死頭痛o架！