亞洲電視誤報前國家主席江澤民死訊，引起各方嘩然，立法會尋日討論是否應該出動尚方寶劍《立法會（權力及特權）條例》調查事件。
立法會旅遊界代表謝偉俊（Paul）有一個提法，就係壹傳媒集團旗下運作「蘋果動新聞」網站嘅「壹傳媒互動有限公司」，因屢次抄襲東方報業集團（下稱「東方」）旗艦網站嘅新聞報道，被海關刑事檢控，係咪都應該調查一下呢？
民主黨副主席劉慧卿尋日提出動議，希望立法會通過成立專責委員會，調查亞視誤報江澤民死訊事件，因為事件已涉及干預編輯自主、有償新聞等問題。謝偉俊反對動議，認為亞視事件只係管理上嚴重失誤，佢又話早前壹傳媒因為抄襲「東方」被控卅三條侵犯版權控罪，壹傳媒承認咗八條控罪，被判罰款四萬蚊並留有案底，呢件案都被認為係壹傳媒管理上有嚴重失誤，「咁又係咪新聞問題、又需唔需要調查有關機構呢」？
立法會投票時否決咗卿姐嘅動議。不過話時話，對於謝偉俊提出係咪都應該成立專責委員會調查抄襲東方報業集團旗艦網站嘅新聞，當然係應該喇，抄得咁猖狂，查吓佢哋點解抄得咁快都好啊。