政情：發叔銅像被指似劉邦
鄉議局今年好多風風雨雨，原本上個月底舉行嘅新一屆執委會就職典禮，又因為打風關係被迫押後，搞到尋日先至補辦，除一眾鄉紳踴躍出席外，主席劉皇發更加開心滿場飛，仲應傳媒要求走到一樓中庭同自己尊銅像合照添。問發叔覺得個銅像造成點，佢就似本報日前報道咁講，有人指銅像似影星狄龍，又有朋友話似漢高祖劉邦喎。吓，劉邦個樣都有人見過？
發叔此話一出，全場震驚，有記者即時問佢點解似劉邦，發叔澄清呢啲都係人哋講嘅啫，總之似乜都冇所謂啦，四四正正咪得喎。講起劉邦，猶記得今年農曆正月年初三，發叔喺車公廟為全港市民求到支「威人威威不是威」嘅籤，籤文部分內容講嘅正係劉邦，仲講述劉邦「白登之圍」被困嘅歷史，唔通因為咁啲人就覺得個銅像似劉邦？
