中環出更：觀瀾湖蘭桂坊合併落戶海口
觀瀾湖同蘭桂坊就好似「日與夜」，幾乎大纜都扯唔埋。不過，凡事都有可能，蘭桂坊主席盛智文同觀瀾湖集團主席朱鼎健（Ken）就合資二十億元人民幣（約二十四億四千萬港元），於海南省海口市嘅觀瀾湖高爾夫球場旁邊打造一個廿四萬平方米嘅「觀瀾湖•蘭桂坊•海口」，預計一三年底落成。佢哋保守估計，開放後首年會賺到投資額百分之十嘅盈利添。
打造超級度假區
Ken話，自己同盛智文好老友，兩個性格好似，走埋一齊就玩得好癲，難怪會諗到呢個咁新鮮嘅計劃。盛智文話，觀瀾湖同蘭桂坊都係國際級品牌，點解唔搞個Crossover，集兩者優點於一身？Ken介紹，呢度將會有十個高爾夫球場、一百六十八個礦溫泉同五百幾間五星級酒店房，仲會有購物長廊、文化旅遊坊、石礦湖等六大主題。
盛智文仲話，自己好鍾意海口觀瀾湖嘅風景，但因為工作太忙，已經十年冇打golf喇。至於兩人各自投資咗幾多錢，佢哋就點都唔肯講，淨係話大家合作得好開心，總之就雙贏啦。