政情：Eva鄭針唔拮到肉唔知痛
多得煲呔曾領導嘅夕陽政府，青年人買樓由理想變成夢想，繼而退化成為奢想，好彩青年人識得未雨綢繆，好多後生仔一夠十八歲就申請公屋，為未來做好準備。不過，早幾日運輸及房屋局局長鄭汝樺（Eva）公開話，後生仔咁快標籤自己係公屋受益人未必有好處，仲叫社會討論吓呢個問題，於是網民響應Eva號召，喺網上激烈討論，但十居其九都係鬧爆佢。
嚴重脫離社會現實
Eva唔贊成後生仔咁快走去輪公屋，因為佢覺得後生仔應該自我增值、進修一下，咁咪有上流機會囉，太快標籤自己未必有好處。Eva講嘅不無道理，但鬼唔知進修一下就有上流機會咩，有網民就喺討論區反問：「唔住公屋我邊有錢進修？」有網民更埋怨：「放工返屋企都九點十點啦，何來有時間進修呢？」真係一針見血。
有網民話：「就係太多人進修咗都無向上機會，先迫不得已申請公屋，依家掉轉頭叫人進修！」網民「愛唱的少年」亦都話：「講真……喺呢個年代有能力搵到咁多錢嘅……有邊個想去申請公屋……」。
相信網民都唔係憎人富貴，只不過係月入數以十萬計、不愁買唔到樓嘅Eva脫離民情。梗係啦，Eva有幾層樓揸手，喺油尖旺區擁有兩個自用物業，早前又放售京士柏山嘅物業，叫價六千萬元，只係一直未能賣出啫，但佢喺九招十二式政策出台前突然封盤，備受質疑。難怪有網民批評：「你自己炒樓賺大把錢」，搞到貧富懸殊得咁犀利。
平心而論，依家啲私樓貴到唔係香港人買，連醫生都話買唔起，試問青年人點買得起呢？好似網民「山林隱士」話齋：「樓價可以畀大眾市民負擔得起咪唔申請（公屋）囉！」須知道Eva口中進修、向上流、買樓嘅方程式已經行唔通，靈活多變嘅後生仔，好自然就一早入紙輪公屋，究竟Eva明唔明白咩叫有頭髮邊個想做瘌痢呢？